Jab school khatam hota hai aur aap kisi media ya journalism college mein aane wale hote ho, toh dimaag mein ek alag hi Bollywood movie chal rahi hoti hai. Aisa lagta hai pehle hi din hath mein mic hoga, samne camera, aur hum kisi badi breaking news ko cover kar rahe honge ya fir kisi blockbuster movie ka set direct kar rahe honge.
Par reality?
Reality thodi alag, thodi chaotic, aur bahut zyada mazedar hai. BJMC ke is pehle semester ne mujhe kaafi kuch sikha diya hai. Aaiye baat karte hain inhi Expectations vs. Reality ki
1. Glamour vs. The Grind
Expectation: College aate hi cool outfits, campus mein chill karna aur bas ideas discuss karna.
Reality: Asliyat mein, sabse zyada time kisi kone mein baith kar editing software se matha pachi karne, scripts ko baar-baar rewrite karne, aur deadlines se theek 5 minute pehle assignment submit karne mein nikalta hai.
2. Dost Nahi, Poori Crew Milti Hai
Media college ka sabse khoobsurat hissa hai wo log jo aapko yahan milte hain. Yahan dosti sirf canteen mein maggi khane tak limited nahi rehti. Kab Ridhim, Jiya, aur Varun jaise doston ke sath ki gayi casual bakwaas ek serious short film ke plot mein badal jati hai, aur kab aapka friend circle ek chhote se production house ki tarah kaam karne lagta hai, yeh aapko pata hi nahi chalta. Ek lighting sambhal raha hai, dusra sound, aur teesra director ban kar sab par chilla raha hai!
3. The ‘Perfect’ Location Ka Struggle
Expectation: Hum aisi short film banayenge jo sidhe Cannes Film Festival jayegi!
Reality: Noida ki dhoop mein, camera aur tripod uthaye, perfect aesthetic aur shanti wali location dhoondhna kisi world war se kam nahi lagta. Pura scene set hota hai aur achanak peeche se koi horn baja deta hai. “Cut! Phir se karte hain.
4. The ‘Unscrolled’ Mindset
Is pehle semester ne mujhe ek cheez zarur sikhayi hai agar actual mein kuch creative karna hai, toh apna dimaag ‘unscroll‘ karna padega. Phone ke endless reels se bahar nikal kar, real duniya ko observe karna hai kyuki asli audience phone me bahar hai unhe impress karna hi sachchi storytelling hai.
Pehla saal chaotic hai. Neend poori nahi hoti, creative blocks aate hain, aur doston ke sath scripts par lambi behes hoti hai. Par sach kahoon? Is chaos ka apna ek alag hi nasha hai. Jab wo aakhri final cut screen par chalata hai, toh sari thakan gayab ho jati hai.
Toh iss bat pe aap logo ka kya kehna hai?
Leave a Reply