Cricket India mein sirf ek khel nahi, ek emotion hai. Aur agar aap Bihar se hain, toh galli cricket ka craze kisi bhi dusre state se kam nahi hai. Lekin jab baat professional level, Ranji Trophy, ya National team mein selection ki aati hai, toh ek sawal hamesha chubhta hai Aakhir Bihar ke local talent ko Bihar domicile ke through chance kyun nahi milta? Kyun ek Ishan Kishan ko apni pehchan banane ke liye jharkhand ka rukh karna padta hai?
Agar aap bhi is khokhle system se frustrated hain, toh chaliye iske peeche ki kadvi sachai aur reality ko samajhte hain.
1. The Dark Phase: 18 Saal Ka Banwaas
Sabse badi tragedy toh tab shuru hui sahab jab saal 2000 mein Bihar aur Jharkhand alag hue. State ka partition toh hua, lekin cricket politics mein Bihar sabse bada loser ban gaya.
BCCI ka affiliation Jharkhand State Cricket Association (JSCA) ko mil gaya, aur Bihar Cricket Association (BCA) apni manyata kho baitha. Agle 18 saalon tak, Bihar ki koi official Ranji team hi nahi thi! Ek poori generation ke talented cricketers ka career shuru hone se pehle hi dafan ho gaya. Jo afford kar sakte thay, wo Bengal, Jharkhand, ya Railways ki taraf migrate kar gaye.
2. BCA Ki Internal Politics: Khel Se Zyada Kursi Se Pyar
2018 mein Lodha Committee aur Supreme Court ke dande ke baad Bihar ko wapas Ranji Trophy khelne ka haq toh mil gaya, lekin corruption aur politics naye form mein shuru ho gayi.
Bihar Cricket Association (BCA) hamesha internal politics aur factionalism yani gutbaazi ka shikaar raha hai. Haal hi mein aise sharmnaak instances bhi hue hain jahan Ranji match ke din do alag alag Bihar ki teams ground par pohoch gayi, kyunki BCA ke do alag factions apni-apni team khilana chahte thay. Jis association ko apne khiladiyon ki fikar nahi, wahan se national level ka talent kaise niklega?
3. Selection Nahi, Setting Ka Khel
Jab system upar se neeche tak corrupt hota hai, toh merit ko kachre ke dabbe mein daal diya jaata hai. Bihar domestic cricket circuit mein hamesha se ye arop lagte rahe hain ki selection fair nahi hota. Paison ki len den, sifarish, aur nepotism ke bajah se aam ghar ka deserving local talent hamesha boundary line ke bahar khada reh jata hai. Aise mahol mein, ek ambitious cricketer apna future secure karne ke liye Bihar chhodna hi behtar samajhta hai.
4. Rajgir International Stadium: Ek Chamakta Safed Haathi?
Ab baat karte hain sabse naye tamashe ki. Patna ke Moin ul Haq Stadium ki khasta haalat aur wahan bhari hui ghaas ko chhupane ke liye ab Rajgir mein lagbhag ₹740+ crore ki laagat se State Sports Academy aur International Cricket Stadium khada kar diya gaya hai. 40,000+ capacity ka yeh stadium dikhne mein toh world class hai, lekin eeton ke mahal khade karne se cricket ka starr nahi sudharta.
Sachai yeh hai ki jab tak BCA jaisi faction-ridden body system chalaayegi, yeh grand stadium sirf politicians ke ‘photo-op’ aur ek mehnge ‘safed haathi’ bankar reh jayega. Agar zilon/districts aur grassroot level par basic turf wickets, academies aur physios hi nahi hain, toh Bihar ka aam ladka is international ground par kab aur kaise khelega? Infrastructure sirf tab kaam aata hai jab uske andar ka ecosystem imandaar ho. Bina merit based system ke, ye stadium sirf dusre states ki teams ko host karne ka ek venue bankar reh jayega.
5. Talent Ka Forced Palayan
In sab reasons ki wajah se, Bihar ka cricketer aaj bhi survival mode mein hai. Agar kisi local ladke mein thoda bhi potential hota hai, toh uske coaches aur parents usse yahi advice dete hain: Beta, agar zindagi mein kuch banna hai, toh jald se jald Delhi, Mumbai, ya Jharkhand bhag jao. MS Dhoni, Ishan Kishan, Shahbaz Nadeem ye sab wo naam hain jinki jaden Bihar ki mitti mein hain, par inki pehchan majbooran dusre states ki jersey pehan kar bani.
Eeton Ke Mahal Se Aage Badhna Hoga
Sachai yeh hai ki Bihar ke gaon-dehat mein aaj bhi aise ladke hain jo 140kmph ki speed se bowling daalne ka dum rakhte hain. Lekin Bihar ka talent tab tak national team mein apni jagah nahi bana payega jab tak dikhawe ke stadium banane ke bajaye, BCA apni niyat saaf nahi karti. Ek transparent selection process aur strong grassroot system hi Bihar cricket ko bacha sakta hai, sirf buildinge nahi.
Leave a Reply